ఆరు కొత్త ముఖాలు

1

నేలకూ ఆకాశానికి మధ్య

ఎవరో జల్లెడ అమర్చారు

హరివిల్లు రంగుల్ని జార్చుకొని

నింగికి శేషవస్త్రమైంది


2

మేఘాన్ని చూస్తూ కాలాన్నిమోశాం

చినుకురాలని గుండెలో వరదబాకు దిగింది

కిరణాలు చెదిరిన నిప్పుముద్ద

మబ్బు కర్చీఫ్‌లో ముఖం దాచుకుంది


3

అనుభవాలన్నీ సాయంత్రాలవే

ఈతచెట్లు కల్లుముంతల్ని కంటాయి

తాటాకు దొప్పల్లో తడిసిన చూపులకు

రెప్పలమధ్య ఉయ్యాల పండగా


4

పాడుబడ్డ బావిగొంతులో

సాలెగూడు చిక్కుకుంది

మెడకు బిగిసిన చాంతాడుతో

గిలక శాశ్వతంగా నిద్రపోతోంది


5

కాలం అడుగుల కింద

ఎండుటాకుల ధ్వని కాలుష్యం

చెట్టుకు నిద్రపట్టదు

తొర్రలో తొండకు సుదిర్ఘ స్వప్నాలు


6

రాత్రి పిట్ట రొద చేస్తోంది

చంద్రుడు చీకటి కోటు తొడుక్కున్నాడు

కొసమెరుపు లేకుండానే

బతుకు తెల్లారి పోయింది


(12.10.2000 రాత్రి 11:55)