బాధోపనిషత్

దేవుడా!

వేదాలను నేనే కనుగొన్నాను

స్వరాలను నేనే సృష్టించాను

యాగానికి నేనే ఆయువు పోశాను

హోమ జ్వాలలో నేనే హవిస్సునయ్యాను

నిన్ను దేవుడ్ని చేశాను, నేను దరిద్రాన్ని మోశాను



ప్రభూ!

అభిషేకాలతో నిన్ను శుభ్రపరిచాను

అర్చనలతో నిన్ను అలంకరించాను

నైవేద్యాలతో నిన్ను తృప్తిపరిచాను

కల్యాణ వేడుకలతో ఊరేగించాను

నువ్వు మోసం చేశావు, శోకం మిగిల్చావు



భగవాన్!

అష్టోత్తరాల్ని నేనే సమకూర్చాను

సహస్రనామల్ని నేనే మాలగా గుచ్చాను

షోడషోపచారాల్ని నేనే సిద్ధం చేశాను

అట్టహాసంగా పట్టాభిషేకం జరిపించాను

నిన్ను హృదయపీఠం పై నిల్చాను, నువ్వు గుండెల మీద తన్నావు



స్వామీ!

నిన్ను స్మరిస్తూనే బాధల్ని మోశాను

నిన్ను ధానిస్తూనే కష్టాల్ని గడిపేశాను

ఏ మబ్బురధంలో దాగున్నావు ప్రభూ!

ఇప్పటికీ నేను నిరీక్షించే చకోరపక్షినే

నువ్వు వానచినుకెప్పుడౌతావో మరి



(12.1.2002, ఉదయం 9:40)