ఒక ఒయాసిస్సు కోసం

నేను పుట్టింది మొదలు

ఈ దుఃఖం అజ్ఞాత శత్రువై వెంటాడుతూనే ఉంది!

ఆశల్ని మీటుకుంటూ

వెన్నెల వసంతాన్ని స్వప్నించి, స్వప్నించీ

నిరాశల ఊపిరి సెగల మధ్య

దగ్ధానుభూతికి లోనౌతాను !


***



అమ్మ ఒడిలో

వెండిగిన్నె పాలబువ్వ గోరుముద్దలకు, ప్రేమ ముద్దులకూ,

నాన్న వీపు నెక్కి

'చెల్ చెల్ గుర్రం - చెలాకి గుర్రం' ఆటల సరదాలకూ

కుప్పతొట్టి సాక్షిగా పెట్టి పుట్టని జీవితం నాది..!

మీ లాగా

నా బాల్యం బంగారు మొలతాడు కాదు

ముఫ్పై వసంతాలు విరబూసినా

మూడుముళ్ళకు నోచుకోని అక్కబోసి మెడను

ఉరితాడు కౌగలించుకున్న కన్నీటి దృశ్యం నా బాల్యం...!

మీరనుకున్నట్టి నా యౌవ్వనం

ఇందిరాపార్కు గుబురు పొదలమధ్య

వెచ్చని కౌగిళ్ళపరువపు గుబాళింపు కాదు

పగబట్టిన ఎన్‌కౌంటర్ నీడలో

గురి తప్పని తూటాకు బలైన తమ్ముడి శవాన్ని

కాటికి చేర్చేందుకు దారిచూపిన నిప్పుకుండ నా యవ్వనం



***



రెప్ప విప్పింది మొదలు

కంటి గూట్లోంచి ఎన్ని కన్నీటి పిట్టల్ని జారవిడిచానో


చిట్లిన జ్ఞాపకాల గాజు ముక్కలకు తెలుసు..!

ఈ ఎండిన గుండెను

ఏ మేఘ శకలమూ చినుకు వేళ్ళతో స్పృశించదు...

ఎడారి అనుభవాల మధ్య

ప్రశ్నార్థకమైన శేష జీవితాన్ని భుజాలకెత్తుకుని

ఇసుక గుండెలోని తడిని పరితపిస్తూ

నా దేహాన్నంతా చూపుగా మార్చుకున్నాను!

కాలిపోతున్న రాత్రింబవళ్ళ మధ్య

శూన్యాన్ని శోదిస్తున్న ఓ ఖర్జూర వృక్షమా ! ఇక్కడెక్కడా

పక్షుల జాడ కంపించదేం...!!