ఒక దుఃఖావరణ గురించి

ఎవరి దుఃఖమైనా సరే

దుఃఖమన్నాక హృదయం కన్నీరుగానే కరుగుతుంది

దుఃఖానికి తడిలేకుండ చెయ్యడం

ఏ మంత్రశక్తికీ సాధ్యపడని అసాధ్యమేనేమో!



ఏ దుఃఖం వెనుక ఏ గాయముందో

గాయానికి ముందు ఏ దుఃఖం సిద్ధపడి వుందో!

భౌతికంగా గాయపడటమే దుఃఖమైతే

అది అప్రయత్నం కవచ్చు, అనివార్యమూ కావచ్చు

తల్లడిల్లే మానసిక గాయానికి మాత్రం

పుండులా సలిపే జ్ఞాపకమే హేతువు

జ్ఞాపకం గాయమౌతుంది

గాయాల జ్ఞాపకం దుఃఖమౌతుంది

కన్రెప్పల కట్టల మధ్య సుడులు తిరుగుతూ

నదిలా ఎగసిపడే దుఃఖం

రహస్యంగా మనసు దరిని కోసేస్తుంది

కోసెయ్యడం కొసకు చేరగానే

అదాటున బతుకుదారం తెంచుకొని

ఆత్మను గాలిపటంలా ఎగరేసుకొంటూ

దుఃఖంతోనే పైకెళ్ళిపోతాం మనం

శూన్యమూ ఒక దుఃఖావరణమే

ఎన్ని దుఃఖాలు కలిస్తే ఈ శూన్యం ఏర్పడిందో!



వాడెవడో

ఆకర్షణ శక్తి భూమికే వుందన్నాడు కానీ

ఆకాశానికీ అయస్కాంత శక్తి వుంది

లేకుంటే, యిన్ని ప్రాణాల్ని ఎట్లా లాగేసుకుంటుందీ!