అవశేషాలన్నీ మ్యూజియం చేరవు

శరీరంలోంచి ఒక్కక బొట్టు రాలి

గది నిండిపోతుంది

తలుపు తెరచి ఎవరూ లోనికి రారు

గది బయట గాలి గడ్డకడుతుంది

తీరంతో కరచాలనం చేయకముందే

నీటి మధ్యలో నావ మునుగుతుంది

తెరచాపలు ఆదుకోవు

చుక్కాని చూపులేని గుడ్డిదవుతుంది

చుక్కలు చుక్కలుగా జారుతూ

ఆకాశం జాలిగా ఏడుస్తుంది

వెలుగుతున్న విషాదం మధ్య

గాయాలు నడుస్తూనే వుంటాయి

నిశబ్దాన్ని వెంటపెట్టుకొని

దిగంబరంగా వెనకాలే నడిచొస్తుంటాయి

గాయానికి ప్రవహించడం తెలుసు

గడ్డకట్టిన దేహంపై ఘనీభవించడమూ తెలుసు

గాయానికి పరిమితి లేదు

ఒక్కోసారి మనసు మీద మానని పుండవుతుంది

ఆలోచనలేవీ బరువు దించవు

శరీరాన్ని మడత పెట్టి

గాయాన్ని గాయపరచటమే పరిష్కారం

నిజానికి ఏ పరిష్కారమూ ముగింపు కాదు

ముగిసిందల్లా పరిష్కారమూ కాదు

అట్నుంచి ఇటు - ఇట్నుంచి అటు

కాలమొక్కటే వంతెన

ఈ వంతెన అంచుల పైన

ఎన్ని ఆత్మలు అదృశ్యమయ్యాయో

ఎన్ని అడుగులు పాదముద్రల్ని చెరుపుకున్నాయో

చరిత్ర పూడికను తీయలేదు

చీకటి దస్తావేజు మీది

అవశేషాలన్నీ మ్యూజియం చేరవు

నడిచే అడుగుల వెనుక

ఒక నీడ వెంటాడుతూనే వుంటుంది


జీవితం ఒక లాంతరు

తన కింద దాగిన రహస్యాన్ని

ఎన్నడూ ప్రమాదంగా పసిగట్టలేదు


ఆదివారం విజేత
01.04.2001