రెప్పలు విచ్చుకుంటున్నప్పుడు

రాత్రి సరిహద్దుదాటి

లేత ఎండ

గుమ్మంలో కొచ్చినప్పుడు

స్వప్నాల్ని విచ్చుకుంటాయి

కళ్ళల్లో వెలుతురు ప్రపంచం

ఇంటింటికీ విస్తరించే రశ్మి

చీకటితోపాటు సోమరితనాన్నీ తరిమేస్తుంది !

చుట్టూరా పరుచుకున్న పచ్చదనం

మొగ్గల్ని పువ్వులుగా పూస్తుంది

కొమ్మమీది పక్షిగానం

గాలి కెరటాలకు సంగీతాన్ని శృతి చేస్తుంది.



నూతిలో

చేదపడ్డ చప్పుడు

బిందె గొంతు నిండుతుంది



తువ్వాయి

తల్లి పొదుగుకోసం

రాటకు కట్టిన తాడును తెంచే ప్రయత్నం !



చెరువులో

అల్లరి బాల్యపు కేరింతల ఈత !

పొలాల్లో కాపురమున్న వరి కంకులకు

మంచు బిందువులే కిరీటాలు

గుడి మైకు

"కౌసల్యా సుప్రజారామా" తో

ఊరి పొలిమేరల్ని దాటుతోంది

ఈ అనంత కాంతి ప్రసారంలో

ఎత్తు పల్లాల మధ్య

తొలి అడుగు

సూర్య బింబంలా విచ్చుకుంటోంది !