కొత్త ప్రకటన

ఈ దేశాన్ని నేను ప్రేమిస్తున్నాను

దీని రమ్యమైన అందాలతోపాటు - దీని మూర్ఖత్వాన్నీ

దీని సమానత్వ సిద్ధాంతాలతో పాటు - దీని చేతగానితనాన్నీ

అన్నిట్నీ కలిపి

ఈ దేశాన్ని నేను ప్రాణప్రదంగా ప్రేమిస్తున్నాను

ఇది

గోల్డుమెడళ్ళను మెరిట్ సర్టిఫికెట్లను పక్కకునెట్టి

కుల ధృవీకరణ పత్రాలకు ప్రాముఖ్యం ఇచ్చినా సరే

దీన్ని నేను ప్రేమిస్తూనే వున్నాను.

ఉద్యోగాల మీద కులాల పేర్లు చెక్కి

ఇది నా ప్రతిభను పాతాళానికి తొక్కివుండొచ్చుగాక

నా తొంభైశాతం మార్కులు పనికిరావని తేల్చి

క్వాలిఫై కొననందుకోలేని మోడు మెదళ్ళకు

నౌకరీలు పంచేందుకు ఉత్తర్వులు జారీ చేసి వుండచ్చుగాక

Still I love my country..

ఇది ప్రమాదపు వలను పసిగట్టలేని అంధకపోతం

రిజర్వేషన్ కాలపరిమితిని రెట్టింపు చేసుకుంటూ

నా జీవితాన్ని చింపిన విస్తరి చేసిన గ్రామసింహం

బతుకును వెలుగుగా మార్చుకోడానికి

ఫలానా కులంలోనే పుట్టాలని నిర్దేశించి

ఇది నాగొంతులో కపట ప్రేమను వడ్లగింజగా వేసింది

చదువులకీ, ఉద్యోగాలకీ నాపై నిషేదం విధించి

కడుపులో ఆరని చిచ్చురేపింది

శాంతి మంత్రోచ్చారకుడ్ని కదా!

నా బతుకును అవమానాల అగ్నిగుండం చేసినా

దీని సహనంతో తల్లిలా ప్రేమిస్తూనే వున్నాను

ఇది పతివ్రత వేషం వేసుకున్న పూతన

నాకు పలకాబలపం కొనివ్వలేనని బీద పలుకులు పల్కి

కొందరికి ఉచిత భోజన వసతుల్తో హాస్టళ్ళు కట్టిస్తుంది

నా చదువుకు కలేజీలో సీట్లులేవని చెప్పి

కొందరికి కోటాలుగా వాటాలేసి పంచుతుంది

జీవితంలో పావుభాగం దాటగానే

నా వయసును ఉద్యోగానికి అనర్హతను చేసి

కొందరికి మాత్రం

వయోపరిమితికి సడలింపు మీద సడలింపులిస్తుంది

ఫిర్ భి దిల్‌హై హిందూస్తానీ


ఏ ప్రాంతమేగినా ఎందుకాలిడినా

తల్లిభారతిని పొగడటం మరచిపోని వాడ్ని

నిండా మునిగినా నిండు గుండెతో

వందేమాతర గీతాన్నై ధ్వనించిన వాణ్ణి

ఈ మట్టిపై మమకారం పెంచుకొని

తుపాకి మందు గుండెను నిలిపిన వీరుణ్ణి

ఇన్ని ఐనందుకు

ఇది నా ముఖానికి ఏరాయితో ప్రకటించక పోగా

నామెడలో దరిద్రాన్ని మూర్చబిళ్ళగా వేలాడదీసింది

అయినా దీన్ని నేను ప్రేమిస్తునే వున్నాను

కానీ

దీన్నిలా మరుగుదొడ్డిగా మార్చిన నాయకుల్ని ద్వేషిస్తున్నాను

మనుగడను ధ్వంసం చేసి పదవి నిలుపుకుంటున్న

నీతిమాలిన చర్యను నిరసిస్తున్నాను

ఇక - రాజ్యాంగం వొంకర నుదిటిపై

సవరణ చట్టం తిలకమైన రోజున

జాతీయగీతం పాడినంత ఉద్వేగంతో

మా నాయకులు నపుంసకులు కాదని

కొత్త ప్రకటన చేస్తాను!!


(ప్రకృతి సాహితి సెప్టెంబరు 2001)