స్తబ్ద చలనం

మబ్బులు పట్టిన ఆకాశం

సూర్యకాంతిని భూమ్మీదకు అనుమతించట్లేదు

ఎక్కడిదో నిలువెత్తు ఇసుక తుఫాను

అరేబియా గుర్రమై

జలపాతపు కొండల్లోకి ఎడారిని మోసుకెళ్తోంది

రాతి ఉదయాల నడుమ

ఎన్నేన్ని గాయపడ్డ అనుభవాలో.. యేమో

పూయడం వసంతాలు మానేశాయ్!

నిద్ర నటిస్తున్న సముద్రం

హఠాత్తుగా కెరటాల పిడికిళ్ళెత్తి

యుద్ధం ప్రకటించడంలో ఆశ్చర్యం లేదు

గమ్యనికి గమనానికి ముడి తెగి

కౌజు పిట్టలు

వలస పక్షుల్ని అనుసరించడమే బహిరంగ రహస్యం

చీలిపోతున్న మనుషుల మధ్య

లోతు పెరుగుతున్న అగాధం భూగోళాన్ని భయపెట్టోచ్చు, ఐనా సరే

తెరలు తెరలుగా ముసి నవ్వులు నవ్వుకుంటూ

సజీవుడి తలదగ్గర దీపం పెట్టడమే ఇక్కడి ఆచారం

కన్రెప్పలకింది స్వచ్చమైన నది

కాళ్ళమీదికి జారిపడ్డాక

చైత్రానికి శిశిరానికి అట్టే తేడా ఉండదు

ప్రేమించే జీవ లక్షణం పట్టు తప్పాక

కదలికకీ నిశ్చలతకీ భేధం అంపించదు

ఇక

ఈ చలనానికి స్తబ్ధత లేదు, ఛస్తే తప్ప

ఈ స్తబ్ధతకు చలనం రాదు, మళ్ళీ పుడితే తప్ప

(ఆదివారం ఆంధ్రభూమి 02.06.1996)