నులక మంచం

ఎంత మంచిదీ నులక మంచం

ఊహ తెలిసిన్దగ్గర్నుంచీ

దీనితో ఎంత అనుబంధమేర్పడిందీ..!

ఈ మెత్తటి నులక మీద పడుకుంటే

అమ్మ గుండెలమీద పడుకున్న అనుభూతి నిచ్చింది

ప్రతి రాత్రి

తాను కొత్త పెళ్ళికూతుర్లా సిగ్గుపడుతూ

నా రాకకోసం ఎంతగా ఎదురుచూసేదనీ..!

అమ్మ కొట్టినప్పుడో, నాన్న కోప్పడినప్పుడో

అలిగి ముడుచుకు పడుకున్నప్పుడు

నన్ను గోముగా సముదాయించిందీ మంచమే

నా వీపును తన గుండెలకు హత్తుకుని

ప్రేమగా పెట్టుకున్న ముద్దులన్నీ

తెల్లారాక వీపుమీద ముద్రలై కనిపించేవి

నా పెళ్ళి రాత్రి

పూల చెండాటలో పాన్పై తెగ మురిసిపోయింది

నేనూ, నా సహచరీ సరసాలాడుకుంటూ

దాంపత్య సుఖంలో తేలాడుతున్నప్పుడు

కిర్రు కిర్రు మంత్రాల ఆశీస్సులిచ్చి

నాకు పండంటి వారసుడ్నందించిందీ నులక మంచమే.

శిధిలమౌతున్న నా శరీరంతోపాటు

ఇప్పుడీ నులకమంచమూ కుక్కిదైపోయింది

చిన్నప్పుడు దోగాడుకుంటూ వీధిలోకెళ్తానేమోని

నానమ్మ నులకమంచానికి నన్ను కట్టేసేది

తరుముకొచ్చిన వృద్ధాప్యంలో

ఎవరూ కట్టేయకుండానే ఈ మంచంలో బందీనయ్యాను

ముసలికంపు కొడుతున్న ఈ దేహాన్ని

అయినవాళ్ళంతా ఈ సడించుకుంటుంటే

ఈ నులక మంచం మాత్రం

ఇప్పటికీ అదే ప్రేమతో నన్ను గుండెలకు హత్తుకుంటూనే ఉంది

నా ఊపిరాగే లోపు

ఏమిచ్చినా దీని ఋణం తీరేట్టులేదు

ఈ మంచానికి కాళ్ళకట్టగా మారితే తప్ప.