18, మే 2009, సోమవారం

జోల పాట

బతుకంత గాయం మిగిలాక

సముద్రం కన్రెప్పల మధ్య ప్రవాహమౌతుంది

రోజుల పట్టాలపై కాలం పరుగెడుతున్నా

ఇప్పటికీ నడిచిన దూరం తెలియటం లేదు

దుఃఖన్ని మోస్తున్న గుండె బరువెక్కుతోంది

గాయాల్ని తట్టిలేపే కన్నీటి ఉదయాలు

హృదయంలో దిగబడ్డ గాజుపెంకులవుతున్నాయి.

బహుముఖాలుగా విచ్చుకొనే కిరణాల వెలుగును

ఏ నల్లమబ్బో ఆ దాటున అడ్డుకుంటోంది

ఎడతెగని కల్లోల ఘడియల మధ్య

ఓ నల్లటి ముసుగేదో నా బతుకు చుట్టేస్తోంది

కనుచూపుమేర చీకటి చెట్లే విస్తరిస్తున్నాయి

మెదడు గదిలో మండుతున్న మేధస్సు

ఆశయాన్ని చేతికందించలేక తడబడుతోంది

నిచ్చెన కొసదాకా ఎక్కిన పాదాలను

నీలి నీడలేవో పట్టి కిందకిలాగేస్తున్నాయి

నేల మీంచి చూపును నింగికి సారించేలోపు

నల్లబూచి నిచ్చెనిక్కి కూర్చుంటోంది


కూలుతున్న నమ్మకాల మధ్య

వర్తమాన నిప్పుల మీద నడకై

అరికాళ్ళతోపాటు, ఆశల భవిస్యత్తునూ కాల్చేస్తోంది

రాజ్యాంగ సూత్రాలు ప్రతిభను తొక్కేసే ఉక్కుపాదాలయ్యాయి

మురుగుకాల్వలో మేధస్సును ఒలకబోసుకుంటున్న

ఈ నల్ల ప్రభువుల ముఖాన్ని ఛీకొట్టి

'మెరిట్'కు 'సెల్యూట్' చేసిన

తెల్లదొరలకు తలొంచి నమస్కరించాలన్పిస్తోంది


ఓరి బడానాయకుల్లారా!

కలలో తప్ప ఇలలోదేన్నీ చూడలేని గుడ్డికళ్ళకి

చూపును మెరిపించే నేత్రదాన శిబిరాలు ఏర్పర్చండి

నడకను స్వప్నించే కుంటితనానికి

కనీసం కృత్రిమకాళ్ళైనా అమర్చిపెట్టండి

ఆసరాలేని అవిటి బతుకులను పునరావాసాలు కల్పించండి

మూగచెవిటి నిరాశల్లో పింఛను దీపం వెలిగించి పెట్టండి

అంతేకాని

అన్ని అవయవాలు సమకూరిన సోమరితనానికి

మితిమీరిన రాయితీలు ప్రకటిస్తూ

మనుషుల మధ్య అసమానతను రేపుతున్న మిమ్మల్ని

మానసిక వికలాంగుల కేంద్రంలో బజ్జోపెట్టి

ఈ దేశ పౌరుడిగా

మీ శాశ్వత నిద్రకోసం సరికొత్త జోలపాట పాడాలనుంది

(19.01.2002, రాత్రి 08:35)

  © Blogger templates The Professional Template by Ourblogtemplates.com 2008

Back to TOP